蒙彼利埃下盤醒里

主場特別生猛
周三凌晨法甲有場獨腳戲補賽，蒙彼利埃主場鬥里昂；蒙彼利埃上場3比1擊敗尼斯打開勝利之門，而且近3次聯賽鬥里昂未輸過，狀態、往績皆對辦，今場受讓必捧下盤。

（myTV Gold 302、Now 639、有線655及615台周三凌晨3時直播）

蒙彼利埃上季法甲腰斬前排名第8位，只比第5位、獲得歐霸盃資格嘅尼斯少1分，表現唔算失禮，而且單計主場成績，佢哋上季14戰取得10勝2和2負，排法甲第3，僅次巴黎聖日耳門及里爾，主場有一定威力。蒙彼利埃今季首戰雖以1比2不敵上季季軍雷恩，不過上周末返回自己地頭即以3比1擊敗賽前2連勝嘅尼斯，取得聯賽首場勝仗，主場威力未見減退，士氣大振下定必乘勝追擊。

里昂迪比上仗走樣
今場原定係里昂聯賽開鑼戰，不過由於佢哋打入歐聯4強需延至今周舉行；里昂上場作客0比0悶和波爾多，荷蘭前鋒迪比經過首仗連中三元後，上場無甚表現，踢至下半場中段更被調離場，水準欠穩，而且里昂對上3季聯賽作客蒙彼利埃僅獲2和1負，往績冇優勢，接連2場作客體力亦見輸蝕，蒙彼利埃受讓絕對抵玩。