水晶宮遇般茅做細界

周三凌晨英聯盃第2圈賽事，英冠球隊般尼茅夫主場鬥英超兵水晶宮。兩支球隊首圈同樣輪空，自動進身第2圈；般尼茅夫降落英冠後陣容有變，主場亦隨時以守代攻；水晶宮實力雖較強，惟主攻並非佢哋強項，勝負難料下，不如捧中位數2.5球入球細。

（周三凌晨2時45分開賽）

般尼茅夫上場喺英冠面對實力一般嘅布力般流浪，都要踢至最後階段，靠丹祖馬入波險勝對手3比2，明顯睇到球隊降班後「被拆骨」實力大減。佢哋近2場雖狂入8球，不過當中1場係熱身賽，未能作準。「般茅」今季有首席射手哥林威爾遜、翼鋒哈利威爾遜及賴恩費沙離隊，加上祖舒亞京治盛傳「跳船」，今場未必上陣，攻力進一步減弱，想入球並唔容易。

上季聯賽碰頭少入波
水晶宮喺英超同樣旗開得勝，以1比0擊敗修咸頓。前鋒韋費特沙夏上半場開紀錄後，全隊就放棄進攻專注防守，成場波控球率不足3成，可見佢哋進攻野心不大。事實上水晶宮擅打防守反擊，前線多人包括韋費特沙夏及安祖斯唐辛等，都係以速度搵食，面對密集防守反而難有發揮。水晶宮上季聯賽38戰只入31球，係英超攻力第2曳球隊，作客難望大捷。

連同上季尾賽事，水晶宮近5仗正式比賽，總入球全開2球或以下，上季聯賽兩鬥「般茅」，加埋只入過3球。今場盃賽一場過決勝負，雙方只會更謹慎，細盤不容錯過！