阿仙奴訪李城博大霧

新門將即簽即用
今晚英聯盃第3圈全英超對碰，李斯特城於主場硬撼阿仙奴。雖然兩軍今仗好大機會出副選，但生牯仔難得披甲必拚盡博上位，其中啱啱加盟「兵工廠」嘅後備龍門溫拿臣，櫈都未坐暖隨時要即刻上陣，雙方近年碰頭常大手交易，有望合演入球騷。

（周四凌晨2時45分開賽）

今仗絕對係第3圈最強戲碼，咁啱兩軍頭兩輪聯賽都贏晒，當然大家以副選列陣機會甚大，但都不能睇小，李斯特城中場占士麥迪臣已擺脫傷患困擾，經過頭2輪聯賽後備上陣，今仗可能擔正熱吓身先。

副選爭上位必拚盡
至於阿仙奴方面，威廉沙列巴、祖爾韋洛克、雷斯尼爾遜等喺聯賽冇機會落場嘅後生仔，相信今仗會被委以重任，連同日前聯賽對韋斯咸奠定勝局嘅尼基迪亞，真係初生之犢不畏虎。

除此之外，阿仙奴尋日官方宣布簽入迪安嘅冰島門將溫拿臣，據報轉會費只係150萬鎊，呢位25歲冰島國腳簽約後已即時參加球隊練習。阿仙奴慣例會用2號門將踢盃賽，隨住達米安馬天尼斯離隊，溫拿臣唔排除會即刻上陣，但佢初嚟甫到乜都未夾過，即遇上李斯特城，非常牙煙，加上近6次交手，有4次開3球或以上，估計今場會多波入。