尼馬大鑊面臨停賽７場

巴黎聖日耳門（PSG）法甲開咧遭遇2連敗，上場對馬賽更出現打鬥事件。尼馬聲稱受到種族歧視，向馬賽後防艾華路蘇比朗出手後食紅牌。據法國傳媒報道，尼馬今次打人「斷到正」，極可能重判停賽7場！

只想同艾華路蘇比朗攬炒
尼馬賽後不斷狙擊艾華路蘇比朗，承認自己行為愚蠢之餘，亦要求同對方「攬炒」，佢喺社交網表示：「種族歧視係真實存在，但我哋唔能夠容忍，我接受自己面臨嘅處分，但同時亦希望罪魁禍首都一樣受到懲罰，嗰個人（艾華路蘇比朗）係蠢材，我中咗佢嘅計，所以我都係個蠢材。」無論如何，PSG今晚主場對梅斯嘅聯賽，都會缺少尼馬。（周四凌晨3時開賽）

不過馬賽就發出聲明，指所有隊友都可以證明艾華路蘇比朗唔係種族主義者，更批評巴西傳媒玩「起底」，公開艾華路蘇比朗嘅私人電話，令佢受到滋擾同死亡恐嚇。至於馬賽中場皮耶仲過火，貼相將尼馬個頭P喺隻狗上面，擺明寸尼馬係狗。