水手半場大搶仙機

日職周三好波連場，其中橫濱水手主場迎戰仙台維加泰。衞冕嘅水手今季戰績波動，已跌出爭標行列，現時於中游位置徘徊，雖然成績下降，但佢哋仍保持高入球量。仙台維加泰同樣戰績倒退，後防失球數字高企，預計今仗會係多入球賽事，況且水手近4次聯賽主場，有3次於上半場開2球或以上，推介中位數1.5球半場大。

（有線662及602台周三晚6時30分直播）

雖然水手未能保持上季佳績，但入球數字仍處於日職前列水平，開季至今聯賽攻入37球，入球數字僅次於榜首川崎前鋒。不過由於水手後防表現唔掂，踢19輪聯賽共失32球，防守能力喺日職排尾4成為致命傷，所以積分上根本無法追近前列隊伍。

經歷9月初3連敗之後，水手近期靠巴西前鋒艾歷利馬嘅亮麗演出，包括上周中梅開二度大炒清水心跳3比0，帶領水手主場報捷，今仗再度主場出擊，艾歷利馬再度擔起得分重責。

維加泰7場不勝甩漏多
仙台維加泰今季表現低迷，日聯盃出局後，喺聯賽連續7場不勝，而且經常喺上半場失守，聯賽排名下跌至倒數第2，不過由於今季日職不設降班，所以會方承受壓力唔大。水手上周主場對心跳，上半場早早領先3比0，估計今場情況相若，半場大好路。