浦項強勢客爆藍翼

周三晚韓職大戰有水原藍翼主場迎戰浦項制鐵，兩隊近期狀態同走勢差天共地，主隊水原藍翼近5場聯賽4次落敗，新帥朴建夏接手呢支千瘡百孔嘅球隊後，表現未見有起色，相反浦項制鐵3連勝，強勢搶亞冠盃資格，今場有望再下一城，捧客勝！（周三晚6時開賽）

3連勝火力全開
水原藍翼近期愈踢愈沉，目前只比包尾嘅仁川聯多2分，而且仁川聯依家上緊力，水原藍翼若未能及時振作，好可能要降班。不過水原藍翼並冇反彈迹象，澳洲王牌射手阿當泰加特已連續2場報稱受傷缺陣，有傳球會已收到來自中東豪門嘅出價，亦係佢連續缺陣嘅真正原因，如果冇埋呢位星級箭頭，水原藍翼反彈機會將更加渺茫。

作客嘅浦項制鐵經過8月4場不勝低潮後，近期已經全面復甦，近3仗全勝攻入8球，伊祖辛高、柏路斯域、文路爾柏拉斯奧斯等星級攻擊手近期輪流擔正，完全無損進攻火力。浦項制鐵依家穩坐聯賽第4，大有機會取得下屆亞冠盃資格，面對弱勢嘅水原藍翼，當然會全力爭勝鞏固前列位置，客勝值捧。