積極擴軍戰力升呢 維拉唔赦錫菲聯

今晚英超頭場戲碼，阿士東維拉主場鬥錫菲聯；維拉近期積極擴軍夠決心，相反錫菲聯開季2戰不勝，暫時仲未踢番上季水準，今場作客讓波制唔過，捧維拉讓球主勝。（Now 621周二凌晨1時直播）

阿士東維拉首周對曼城嘅聯賽延期，今場係佢哋本季第1場聯賽，佢哋上周末喺熱身賽小勝曼聯1比0，然後英聯盃作客3比1擊敗英甲代表伯頓，狀態唔錯，球會由阿仙奴羅致阿根廷門將達米安馬天尼斯，另從里昂簽入前鋒貝特蘭查奧爾，攻守實力相信都有所提升，舊將要爭位更加要搏。睇番維拉上季19場聯賽主場攞到7勝3和9負，其中9次輸波有7場係輸畀前7名硬嘢，對住同級球隊一啲都唔輸蝕。

錫菲聯新季未贏過
錫菲聯上季新升班以第9名過終點，成績令人眼前一亮，不過呢隊波向來擅守不擅攻，而且實力曝光後想再偷雞唔容易。錫菲聯上季復賽後演出明顯跌Watt，10場聯賽只得3勝2和5負，當中6場作客2和4負，加上聯賽首戰淨吞狼隊兩蛋，上場英聯盃互射12碼亦被般尼踢出局，士氣受挫。計埋往績，錫菲聯對上5次聯賽作客維拉只得3和2負，讓球主客和今場仲要讓波，寧捧讓球主勝。