利物浦唔上心難炒林肯城

利物浦今晚英聯盃第3圈作客英甲球隊林肯城；「紅軍」領隊高普向來視英聯盃為練兵之地，喜用副選出擊，佢哋嚟緊聯賽要火併阿仙奴，今場唔慌去盡，加上近6季英聯盃第3圈成績只得2勝2和2負，總入球全開3球或以下，就算贏波都好難出現大手交易。

（周五凌晨2時45分開賽）

衞冕英超嘅利物浦聯賽開季2連勝，保持強勢，不過高普對待英聯盃呢類本土盃賽向來唔多上心，可以預期穆罕默德沙拿、沙迪奧文尼及華基爾雲迪積克等常規主力將獲休息機會，取而代之會係奧歷治、哈維艾利洛、居迪斯鍾斯及薛比雲丹貝治等二線兵，但呢班副選就算落場亦唔會搏得太盡，以免無辜受傷影響日後聯賽調動，隨時留有一手。

林肯城態勇頂得吓
林肯城喺英甲開季亦取得2連勝，而且計埋英聯盃、英錦標在內，今季5仗攞到4勝1和，狀態甚弗，主場踢士氣波可望負隅頑抗，預計今場入波唔會多，勝負隨時一球起、兩球止。

至於利物浦同韋拿杜姆續約一事出現阻滯，英國傳媒報道，呢位29歲荷蘭中場拒絕咗球隊開出嘅續約條件，意味佢出年夏天可以自由身離隊，普遍認為佢會轉投巴塞，跟隨朗奴高文搵食。