賓菲加半場Ｗ抵玩

 易帥搶食法馬利卡奧
葡超今晚亦都開鑼，揭幕戰由法馬利卡奧主場對賓菲加，傳統勁旅賓菲加上季因為喺聯賽重開後，未能及時重拾狀態，導致被波圖搶走冠軍寶座。球隊痛定思痛，今夏換帥兼積極增兵，爭標決心更強，首仗勢必搶攻。加上賓菲加近4次對法馬利卡奧，有3次上半場領先，直取半場客勝。

（周六凌晨2時開賽）

充實兵源採取主攻
上季葡超因為新冠肺炎大爆發，一度停擺3個月，賓菲加原本爭標形勢大好，但聯賽重開後，表現卻走晒樣，最終痛失冠軍，明顯喺停擺期間備戰不足，未收咧教練般盧拿治已被炒。賓菲加會方上月初聘請佐治捷西斯回巢執教，呢位66歲名帥曾於2009至15年執教賓菲加，為球隊捧過3次葡超、5次葡萄牙聯賽盃、1次葡萄牙盃，並2次打入歐霸盃決賽，由佢負責重建賓菲加，絕對係最佳人選。

賓菲加今夏亦簽入多位猛將，包括巴西射手艾華頓索拉斯、德國中場禾特舒密特、比利時後衞維頓漢等球員，前中後3線實力都獲得提升，今場作客應會照樣採取主攻。

至於法馬利卡奧上季升上葡超，最終獲得第6位，整體成績令人驚喜，但其實佢哋下半季已經開始走下坡，明顯被對手睇穿路數，今季前景唔樂觀。法馬利卡奧上季曾經4次同賓菲加交鋒，只取得2和2負，其中3次上半場落後，可博半場客勝。