曼城秘方半場多波入

主力谷狀態 幼齒夠搶韁
近3屆盟主曼城今晚喺英聯盃第3圈登場，主場鬥今季降落英冠嘅般尼茅夫。曼城習慣喺英聯盃出大量副選同青年球員，但往往踢出活力同超水準，好似上屆咁，除4強次回合因早早領先放軟手腳，其餘5場早段就順利先開紀錄，今仗可照辦煮碗。

（周五凌晨2時45分開賽）

曼城領隊哥迪奧拿事先張揚，今場會起用大量青年軍，再搭幾位富經驗但未操起狀態嘅球員。「藍月亮」近年沿用呢條方程式出戰英聯盃，成績依然彪炳，連續3屆捧盃而回。好似舊年咁，阿古路受傷休息咗一排，佢真正喺聯賽復出前，就先喺聯賽盃上過陣，今場馬列斯亦好大機會倣效，呢位阿爾及利亞國腳之前中咗新冠肺炎缺席操練，今場正好畀機會佢寓賽於操，加上新兵費倫托利斯，曼城進攻火力依然咁猛。

事實上曼城喺英聯盃就算出後生仔，佢哋為求上位，落到場都極度搶韁。以上屆為例，曼城同由第3圈打起，6場英聯盃除4強次回合因領先曼聯3比1放軟手腳，其餘5場一早就入波，4場開出半場大。

般尼茅夫踢法性感
今場對手般尼茅夫踢法性感，好可能同「藍月亮」鬥攻，曼城近5次喺主場鬥般茅，4次半場總入球2球或以上，今晚半場實多波入。