今晚英冠头场，打比郡主场迎战伯明翰。虽然打比郡仍深受降班威胁，但主帅朗尼发表效忠宣言，有助稳定军心，加上主场出击特醒，面对近况麻麻嘅伯明翰，必藉地利抢分，让平半照捧上盘。（有线661及601台周日晚9时30分直播）
伯明翰作客丧失波
打比郡因财政问题被扣21分，搞到依家得14分排尾2，查实佢哋27仗联赛取得8胜11和8负，理应获得35分，呢个分数足以稳占中游，可见众将仍未放弃嘅决心，主帅朗尼亦功不可没。呢位英格兰史上士哥王，用尽方法搞好队波，做好领军工作之余，自己畀埋训练场费用，真系出钱又出力，仲话打比郡唔单止系一间球会，仲畀到呢座城市希望，因此会畀追寻梦想嘅小将上阵机会，近期朗尼获母会爱华顿力邀执教，最终选择拒绝，更发表效忠宣言，称现时执教打比郡，对佢嚟讲非常重要，确能激励士气。
伯明翰由另一位前英格兰国脚保耶掌舵，不过成绩麻麻，近5仗联赛只得1胜2和2负，若果单计作客，近4仗联赛仅得1和3负，更狂失14粒，包括造访富咸惨败2比6，不宜高估。打比郡虽有中场拉夫摩利臣坐波监，幸好喺自己地头比赛特醒，近5仗联赛主场取得4胜1负，包括击败般尼茅夫、西布朗等前列分子，为抢分护级唔会放过伯明翰，上盘有计。