今晚欧联「死亡C组」重磅大战，西甲巴塞隆拿主场硬撼德甲拜仁慕尼黑。巴塞出线形势被动，今仗非胜不可，但焗攻随时令防线暴露更多空位，加上近年碰头畀拜仁食住，呢支德甲班霸受让平半笋到爆，下盘咪错过。
（Now 643周四凌晨3时直播）
先讲讲呢组形势，榜首拜仁手握12分，领先次席国际米兰5分，已提早锁定前两名出线资格。巴塞则落後国米3分，若然较早时间开波嘅国米失分，巴塞出线仲有一线生机，到时形势上许胜不许和，冇选择下球员要压前抢攻。
可惜喺朗奴阿拿奥祖及安达斯基斯坦臣相继受伤後，巴塞防守明显不稳，尤其近两轮斗国米，正正因为防线犯错导致只得1和1负失4球，搞到对赛成绩输蚀，而且佢哋进攻过於倚赖罗拔利云度夫斯基数胡，欠缺其他稳定得分点，更容易畀对手冻结，加上面临出局压力，演出随时走样，可谓种种不利因素集於一身。
罗拔佬转会结怨趁机踩多脚
拜仁虽然提早出线16强，但都要抢分保住首名，何况今夏「罗拔佬」离队一事同巴塞结怨，点会放过踩多脚机会。从阴谋论角度嚟讲，巴塞实力点都高过国米，拜仁梗系唔想喺之後嘅淘汰赛再撞「地上最强」，更加冇理由放生佢哋，今仗一定趁佢病攞佢命。除咗沙迪奥文尼及基拿比回勇外，後备前锋祖普莫亭近期频频入波，难怪球队近7仗录得6胜1和狂轰27粒，火力全开。翻查纪录，两军近5次欧联交手，拜仁全部赢晒，摆明格食格，下盘放心捧场。
