[太阳拆局] 英超:红军博反弹大省招牌

作客同白礼顿斗攻

同晚另一场英超爆发「红白大战」，白礼顿主场迎战利物浦，白礼顿踢法积极主动，入波多失波亦多，近7仗联赛全开4球或以上。利物浦上仗联赛9人应战下惨负热刺1比2，此仗可见「红军」攻力甚强，预计将同「海鸥」斗攻，入球骚可期，捧3.5球入球大。（Now 621及611周日晚9时直播）

「海鸥」白礼顿踢法有前冇後，极富娱乐性，睇番佢哋今季表现，既能击败纽卡素同曼联，却又输畀韦斯咸同阿士东维拉，其中上仗联赛斗维拉虽然大败1比6，但球员踢到最一刻仲谂住进攻，上周中欧霸盃作客马赛一样照攻，结果喺半场落後两球之下逼和2比2，相信佢哋今场踢法唔会改变，继续抢攻。

三箭齐发抢士哥
利物浦上仗不敌热刺，联赛不败身被破，但其实佢哋输波同球证误判有莫大关系，赛後亦闹出唔少风波。「红军」上下谷埋一肚火，会用表现嚟证明自己，佢哋今仗有居迪斯锺斯同迪亚高祖达停赛，前锋加普受伤缺阵，幸好兵源足够调动，上周中欧霸盃开斋入波嘅赖恩格云贝治，将继续获重用，前锋线亦有穆罕默德沙拿、达云纽尼斯、路易斯迪亚斯三箭齐发，对住中门大开嘅白礼顿，肯定大把波入。