明尼路主場犀「菲」利
巴甲上演前列大戰，明尼路狹4連勝餘威，喺主場硬撼利斯菲體育會，絕對有能力繼續贏落去，保持佢哋喺榜首嘅優勢，足智彩開讓球主客和，明尼路「讓主」有2.12倍，用嚟過關簡直犀「菲」利。（周三19，香港時間周四9:00am開賽）
一哥明尼路上周作客以3:1輕取國際體育會，馬高素爾梅開二度持續勇態，泰亞高列比路亦有「士哥」，後者喺2:0擊敗哥列迪巴一仗已經包辦全場兩個入球，呢對攻擊組合近期真係愈戰愈勇，難怪球隊已經連續4場獲勝，真係贏到唔識停。利斯菲體育會排得喺前列，近況亦唔差，近8場未嘗一敗，只係作客表現就要打5折，事關佢哋已經連續4場作客賽事和波，包括上周同艾華爾踢成2:2，另外以1:1打和查比高恩斯，今次作客實力更強嘅明尼路，睇怕都係凶多吉少。
甘美奧搶分機會樂觀
另外，查比高恩斯主場對二哥甘美奧，想搶分好難樂觀，因為查比高恩斯近排表現都係反反覆覆，包括以1:1賽和利斯菲體育會、0:1不敵彭美拉斯，同埋1:0小勝華斯高，投注喺佢哋身上簡直係無所適從。相反地，甘美奧已經取得5連勝，包括上周以3:1輕取山度士、1:0擊敗高士路、2:1勝艾華爾、1:0贏彭美拉斯，同埋2:1擊敗帕拉尼恩斯，上次輸波已經係一個月之前，既然狀態咁好，梗係唔好俾佢停，平手盤捧甘美奧。（周三12，香港時間周四6:30am開賽）
同日費古倫斯主場對祖恩維爾就有失分危機，因為費古倫斯射手基頓達施華被巴西U22徵召應付泛美運動會，陣容並唔完整，足智彩開讓球盤，費軍讓半球、一球冇把握，捧祖恩維爾下盤。（周三17，香港時間周四8:00am開賽）