前鋒鬥多特「大」無畏
呢個星期開始有一堆友賽上演；多蒙特亞洲之旅一來志在掘金，二來正好俾新教頭杜查試兵機會，當中除咗日本國腳香川真司會上陣外，多名陣中星級球員都有隨隊，而川崎前鋒正值兩階段聯賽休戰時間，狀態應該喺多蒙特之上，相信今場會係一場超級入球騷，要出手買一注入球大應該十拿九穩。（周二1，香港時間周二6:00pm開賽）
多蒙特夏天未有大動作，新加盟球員包括干沙路卡斯度，以及弗賴堡嘅布基等，不過球隊都有充分資金俾杜查增兵，嚟緊開季前應該都會有新星加盟；不過就算以多蒙特現有陣容，有奧巴美揚、恩莫比利等，要喺日本球隊身上取得入球應該都不成問題，何況香川仔返到祖家落場必加多兩錢肉緊，呢場多蒙特喺進攻火力上有足夠保證。
前鋒例牌有前冇後
川崎前鋒一如過去幾季都係一支有前冇後嘅球隊，日職首階段聯賽佢哋雖然只位列第5，不過入球數就排第2，國腳大久保嘉人及外援艾辛奴都有一定能力，而今戰作為次階段聯賽熱身戰，佢哋都應該會全力出擊，所以呢場波大有可能會係兩軍鬥攻局面，入球大穩開，補多注半場大都極有可能一拼命中。