洛杉磯銀河「加」注捧

洛杉磯銀河「加」注捧 
 
過去唔睇美職嘅你，新一季都可能要多啲留意呢隊洛杉磯銀河，因為前紅軍隊長謝老四已強勢加盟，肯定在明早開波嘅國際冠軍盃首度亮相，當然銀河都唔只得謝拉特一個，羅比堅尼等都仍然有心有力，呢場洛杉磯銀河面對CF阿美利加，點計都有半個主場之利，信佢哋可以旗開得勝。（周六32，有線61、201台周日11:30am直播）
謝拉特於七月七日開操，球會方面已確認今場佢會納入大軍名單，雖然未必會即時正選上陣，但就算佢打半場都肯定威力十足，仲記得當年碧咸嚟到喺實力上都已經有壓場之感，謝拉特喺中場效率更高，肯定更有效幫到球隊爭取入球。而事實上，射手羅比堅尼仍然有極強戰鬥力，上場聯賽大勝多倫多就連中三元，雖然陣內有薩迪斯等代表美國缺陣，但實力不致大幅削弱；相對上，CF阿美利加已個半月冇正式賽事，賽前並未有任何熱身賽，而且陣內有主力離隊及新教練上場，今次出戰呢個盃賽似乎冇太大決心，捧洛杉磯銀河應該可以贏波贏盤。