美國讓主「馬」到功成

美國同埋危地馬拉為咗備戰美洲金盃，突然加插一場友賽進行最後檢閱，不過美國人強馬壯兼鋒力強橫，危地馬拉今次作客隨時捉蟲，所以足智彩開讓球主客和，捧美國開「讓主」好穩陣。（周五2，香港時間周六6:30am開賽）
由奇連士文率領嘅美國，基本上徵召晒大家最熟悉嘅球員，包括阿士東維拉門將巴特古辛、慕遜加柏後衛法比安莊臣、FC多倫多中場兼全美職最高薪本土球員米高巴特利、前熱刺同埋富咸球星丹普西、仲有踢過侯城同新特蘭嘅射手艾迪杜利，呢班人腳喺美洲踢夠晒啦，否則都唔會連續兩場友賽爆冷擊敗歐洲勁旅，包括以4:3力克荷蘭，同埋2:1搞掂德國，所以千祈咪睇小美國隊，相信成班球員嘅信心亦正值顛峰。
危地馬拉近況其實麻麻，佢哋喺上場世界盃外圍賽僅勝弱旅百慕達1:0，另外，喺友賽又先後大敗予烏拉圭同埋墨西哥，加上今次點兵嘅人腳普通，大部份球員都係喺國內聯賽效力，另外仲有幾位踢緊美職，今仗真係冇乜可能阻止美國開「讓主」。