英格蘭女足一定「德」
女子世界盃季軍戰，德國同埋英格蘭兩支宿敵碰頭，不妨秤先三獅女足，事關佢哋4強其實表現好好，最後輸烏龍波先冇份爭冠，今仗谷住道氣撼德國女足，仲有受讓1球優勢，梗係揀「讓客」！（周六19，香港時間周日4:00am開賽）
德國女足喺4強以0:2不敵美國女足，巴黎聖日耳門女足前鋒美泰格、法蘭克福女足前鋒莎絲、中場娜德爾、後衛後衛巴杜絲琦同埋拜仁慕尼黑女足後衛美耶，全部喺上仗正選出戰，不過莎絲就射失12碼，成為輸波罪人，故即使佢以6球領先射手榜，亦隨時影響比賽信心。
德國女足教練妮迪表示，球員喺4強已經盡晒全力，輸波只能夠接受現實，但承認陣營內士氣普通，唔少球員仍然情緒低落，女仔係多愁善感啲嘅，明架喇，不過就可能會影響季軍戰勝算囉！
英格蘭女足可能都會有同樣情況出現，佢哋喺4強以1:2不敵日本女足，踢到補時兩分鐘先至輸球烏龍波，的確係好唔抵，故此好多球員完場後都放聲痛哭，真係見到都心痛，不過呢班三獅娘子軍有英格蘭男足呵番，好似加利卡希爾同埋韋舒亞等球星，都喺社交網絡公開支持佢哋。
英軍教頭揚言奪季
另外，波特蘭荊棘女足前鋒祖迪泰萊、曼城女足前鋒東妮達根、利物浦女足中場威廉姆絲同埋另一曼城女足後衛史提芬妮侯治頓都會繼續正選披甲，而門將卡倫芭斯莉據報已傷癒，領隊馬克森遜強調要捧個季軍返嚟慰球迷，既然佢講到咁，就信佢英格蘭女足一次咁多啦，捧佢哋開「讓客」執尾彩。