連泰斯主場無「迪」
未齊腳嘅哥連泰斯喺最近4場巴甲都贏到3場咁多，今次可以用到較強陣容，而且仲喺自己地頭出擊，對住實力唔強嘅邦迪比達失分都幾難同球迷解話。（周四12，香港時間周五6:30am開賽）
實在擔心過哥連泰斯會喺上個月嚴重走樣，事關年青射手馬干奧利華拉要代表巴西U20踢世青盃，另外中場重臣伊利亞斯文迪斯就直情入選埋巴西國家隊踢美洲國家盃，突然少咗兩個球員都咪話唔會打亂部署，好在佢哋喺近4輪巴甲依然贏到祖恩維爾、國際體育會，同埋費古倫斯，睇嚟影響唔係咁大，今次可以用番較強陣容應該唔會驚邦迪比達。不過要小心哥連泰斯喺4月舉行嘅巴省聯淘汰賽遇到邦迪比達都只係能夠小勝1:0，雙方嘅差距未必有想像中咁大。
費古倫斯半和「斯」人醒
同時間舉行嘅費古倫斯對住戈亞斯就係正正式式嘅「五五波」，主隊費古倫斯喺近7戰有成6場比賽都有失波，而戈亞斯就仲衰，喺近5戰輸足4場咁多，兩邊都唔係喺最佳狀態之下示人，睇唔到邊隊波佔到上風，頭45分鐘可能會踢成平手。（周四13，香港時間周五6:30am開賽）