牙買加和波「大」局已定
美洲金盃B組賽事繼續開打，牙買加首戰一如所料狀態勝一籌，以2:2迫和哥斯達黎加，而通過咗最難打一關，餘下兩戰對手僅為加拿大及薩爾瓦多，多取一場勝仗力足出線，而佢哋今戰先打主辦國之一加拿大，基於對方都有主場之利，牙買加唔會太輕鬆，呢場估雙方都係和波收場居多。（周六21，香港時間周日6:30am開賽）
加拿大雖然作為主辦國，不過今場波就喺美國上演。佢哋今次喺大賽行得幾遠都係未知數，因為球隊喺足球發展上近年有啲遲緩，今次大軍上基本上冇高質外流兵在陣，中前場主力都主要係美職聯球員，首戰僅迫和薩爾瓦多已經令人非常失望，就算最終喺呢組出到線，睇怕都好難闖入8強。
相對上，首戰我哋推介牙買加不敗，原因全在於牙買加有眾多球員戰畢美洲國家盃，球員整體狀態肯定比對手好，不過今場情況有啲唔同，一來加拿大都已經打咗場正式賽事，二來對方有多名球員喺北美洲打聯賽，聯賽亦正值開打期間，唔會有狀態差距問題，反而呢場勝負關鍵僅在球員質素。
當然牙買加防線有多名英超、英冠兵級數高好多，但前線球員質素平平，今場都唔易咬入加拿大，而加拿大亦有半個主場之利，今場應該有唔少加國球迷去鄰國打氣，拉上補下雙方喺各方面都冇絕對優勢，今場捧和局合情合理。