今晚英超聯賽壓軸戰，兩支升班馬白禮頓及紐卡素狹路相逢。兩軍去季於英冠爭到頭崩額裂，今季一齊升上英超，但暫時成績迥異，由名帥賓尼迪斯率領的紐卡素踢出氣勢，截稿前更名列四強之一，開出平手盤下，有力坐和望贏。
曾經帶領利物浦贏得歐聯冠軍的賓尼迪斯，其後的執教生涯反伏不斷，遭國際米蘭及皇家馬德里炒魷後，他上季毅然接過紐卡素的教鞭，希望由低做起再創傳奇。結果喜鵲亦無令他失望，最終以一分力壓白禮頓於英冠封王，得以重返英超。
開季後，紐卡素也非一帆風順，首兩仗不敵熱刺及哈德斯菲爾德。但其後該隊演出回升，過去三場英超分別擊敗韋斯咸、史雲斯及史篤城全取九分，暫時排名甚至更高於利物浦、阿仙如及熱刺等勁旅，可謂相當難得。在三連勝的路途上，紐卡素入六球只失一球，面對上季首次循環均不敵他們的白禮頓，絕對有能力乘勝追擊。
反觀白禮頓於英超予人唔夠班的感覺，六場聯賽只得一勝一和三負，球隊至今只入得四球而失七球，攻守均欠佳下，縱有主場之利亦難過信。