歐洲國家聯賽A3組賽事，葡萄牙今晚於主場迎戰意大利。近年國際賽的成績，葡軍絕對在皮靴國之上，但今仗缺少王牌C朗，而且比賽並非太重要，估計雙方的爭勝意欲皆麻麻，和波及意軍下盤均可一試。
歐洲足協首辦歐國聯，當然極盡宣傳之能事，各國傳媒亦怕冇嘢做，自動自覺為其唱好。究其實，球迷眼睛是雪亮，世界盃決賽周剛剛收爐，六大聯賽又開鑼，有比較之下，此所以歐國聯的聲勢谷極都谷唔起。
即使撇除外間或球迷的反應，看看球員對比賽的態度，也可對這項賽事的重性要略知一二。葡萄牙球王C朗，於今次國際賽期申請免役與女友出海渡假；歐洲中堅分子丹麥更差點鬧出罷踢風波……。如果是真正打真軍的比賽，會出現這樣的情況嗎？大家心裏有數。所以筆者縱然倒米都要講句公道說話，歐國聯只是巧立名目的高級友賽而已！
C朗是大哥之中的大哥，他要請假，足總豈會唔批，但這位國家英雄過去甚少借故不出席國際賽，大抵可以反映出歐國聯的所謂吸引力。
缺少C朗，葡萄牙當然不會群龍無首，因為他們畢竟是歐洲盟主，但他的避戰，難免會影響隊友的作戰情緒。好老實講，葡萄牙球星不乏天王身價之輩，踢完今場太公波，之後又要應付英超、西甲，話畀你聽好好鬥志，你都唔信啦！上仗友賽與克羅地亞戰平，後者是世界盃亞軍，是不錯成績喎，但對手又何嘗不是諗住交差呢？
意軍無緣世界盃，過去3場國際賽面對法國、荷蘭、波蘭都未嘗一勝，有點走上荷蘭過去幾年愈踢愈耷的舊路。意軍的最大問題是未見頂級球星接班，由前鋒線至防線的水平皆與九十年代及二千年代有距離，唯一值得慶幸是葡軍戰意不高，大家湧吓湧吓又一場，隨時和波收場。
（超 人）