終極一戰破釜沉舟
歐聯今、明兩晚上演最後一輪分組賽，目前形勢最激烈必選「死亡C組」，拿玻里、利物浦同巴黎聖日耳門（PSG）3隊只能活2隊，其中紅軍利物浦今晚喺主場迎戰拿玻里許勝不許和，以紅軍主場氣勢兼有破釜沉舟決心，讓一球上盤絕對值博。
（香港開電視77台、Now 643、有線662及602台周三凌晨4時直播）
目前歐聯16強已定出12隊，仲有4個席位要踢埋今輪先知結果，其中只有C組未有一支球隊肯定攞到出線資格，依家拿玻里以9分排榜首，今場只要唔輸便可打入16強，不過紅軍出線命運仍然掌握喺自己手中，事關佢哋只要贏1比0、或者淨勝2球或以上，就唔使理會其他戰果肯定出線，目標鮮明，唔使諗咁多一定搏盡。
相信唔少球迷睇到呢個形勢都會諗起2004/05年球季，當年紅軍喺最後一輪分組賽主場對奧林比亞高斯，又係必須淨勝對手2球才可晉級，結果佢哋喺半場落後0比1嘅劣勢下，憑下半場連轟3球反勝3比1出線，最後仲喺決賽贏埋AC米蘭捧盃，寫下經典一頁。雖然依家球隊上下都已人面全非，不過嗰份主場氣勢及不屈不撓嘅精神，經過咁多年後有增無減，從今屆首場分組賽主場對PSG，由領先2球到完場前被追和，再喺補時入波絕殺對手，充分反映去到生死關頭，紅軍爭取贏波嘅決心係幾咁強大。
拿玻里征英倫例瓜
紅軍上場聯賽大勝般尼茅夫4比0，除力壓同日輸波嘅曼城上英超榜首，紅軍粉絲最開心係見到連中三元嘅穆罕默德沙拿狀態回勇，加上有艾利臣比加把守最後一關，紅軍嘅攻守表現已達歐洲頂級水平。拿玻里對上3次歐聯作客英超球隊全敗，加上今夏季前熱身賽作客晏菲路又淨吞5蛋，今次重臨凶地睇怕凶多吉少，紅軍主場讓一球，上盤值得支持。