今晚東南亞錦標賽爆發決賽首回合，先由馬來西亞主場迎戰越南。馬來西亞今屆東錦賽法定時間贏得3仗咁大把，而且主力沙發利坐波監，實力削弱，相反越南有射手阮公鳳壓陣，加上近年喺東南錦碰頭食住對手，今場有力反客為主，客勝好路。
（有線602及662台周二晚8時45分直播）
馬來西亞雖然喺4強淘汰衞冕嘅泰國，但兩回合只係打和2比2，僅僅靠較多作客入球晉級，若非泰國喺次回合補時階段射失12碼，馬來西亞已經出局，幸運成分極高，而喺嗰場末段犯規導致被罰12碼嘅主力沙發利做埋「紅牌阿姑」，今場要坐波監，影響非常之大。
越南美斯腳風順
睇番馬來西亞喺今屆6戰法定時間內，只得3勝2和1負，晉級過程唔多夠說服力。相反，越南喺今屆6戰法定時間取得5勝1和未輸過，4強兩回合計以4比2擊退由名帥艾歷臣領軍嘅菲律賓，霸氣十足，其中有「越南美斯」之稱嘅阮公鳳今屆已入咗3粒。翻查紀錄，兩軍近4次喺東南錦交手，越南錄得3勝1負，明顯格食格，今仗可搶先機，客勝有計。