周三凌晨歐聯B組尾輪連場激戰，熱刺將會作客挑戰巴塞隆拿。力爭最後出線席位嘅熱刺為免夜長夢多，呢場面對巴塞肯定傾巢而出搶攻劍指3分，不過巴塞實力強勁，而且近年歐聯主場專剋英超球隊，邊有咁易畀佢哋過到骨，捧番主勝好過。（Now 644、有線603及604台周三凌晨4時直播）
賽前熱刺雖然同國際米蘭同樣攞住7分，不過熱刺對賽作客入球更佔優，意味住煞科戰之後熱刺只要保持同國米同分，都可以順利晉級。可惜熱刺今屆2場歐聯作客只得1和1負，仲場場都失2球，防線表現認真麻麻。相反已經鎖定出線資格嘅巴塞，上次歐聯主場輸波，已經要數到去02/03賽季，4強次回合主場不敵拜仁慕尼黑，之後28場歐聯主場豪取26勝2和嘅不敗成績，其中5次面對英超球隊大獲全勝，可見熱刺呢場想搶足3分真係難過登天，寧願捧主勝。
國米半場搞得掂PSV
而同組國米將會主場出擊鬥燕豪芬，國米對賽成績差過熱刺，呢場肯定要靠攞更多分數，先可以壓過熱刺晉級。相比起要作客硬撼強敵巴塞嘅熱刺，國米對手燕豪芬肯定易應付得多，皆因呢支荷甲球隊今屆小組賽5戰得1分，已經鐵定無緣晉級，連歐霸都冇得爭，呢場成為例行公事。實力更強嘅國米齋靠戰意都肯定贏對手成條街，國米近6場主場賽事有4場半場取得領先，半場主勝唔好錯過。