另一場C組賽事巴黎聖日耳門（PSG）將會作客貝爾格萊德紅星。PSG手握主動權，今場贏波即出線，以尼馬、基利安麥巴比及卡雲尼組成的三叉戟勢必狂攻對手，不過PSG今屆5場分組賽場場有失波，讓球盤讓兩球好似唔多抵玩，改捧中位數調高至3.5球嘅入球大。
（Now645、有線601及661台周三凌晨4時直播）
PSG現時5戰得8分排小組第2，今戰只需贏波便篤定以頭2名進身16強。PSG今屆歐聯可謂先苦後甜，除首場作客利物浦於補時失守被絕殺，第3、第4輪兩鬥拿玻里俱和波收場，踢完4場分組賽僅排第3，幸好球隊於上輪關鍵戰以2比1擊敗利物浦，重新掌握主動權，今場斷不會白白放過上場辛苦建立的出線優勢。
今屆分組賽場場失波
PSG上周末聯賽因國內近日出現大規模示威而改期，球隊多咗時間休息，早前先後受傷嘅尼馬、基利安麥巴比及卡雲尼均已復出，加埋迪馬利亞、達斯拿等後上支援，火力強勁，生死關頭主帥杜曹冇得留力，肯定出盡法寶狂攻紅星。不過，PSG防線亦不時出現甩漏，除咗今屆5場分組賽場場有失波，對上2場聯賽鬥波爾多、斯特拉斯堡亦先後賽和2比2及1比1。
紅星以4分敬陪末席無緣晉級，但如果紅星今場贏波，另邊廂利物浦不敵拿玻里，紅星將可升上小組第3轉戰歐霸盃。更何況紅星今屆分組賽主場出擊，先後打和拿玻里0比0及以2比0擊敗利物浦，首循環作客PSG雖然輸1比6，亦能取得入球，並非任人魚肉，今場轉捧入球大更明智。