本周英超暫停，為足總盃第5圈賽事讓路，被視為目前歐洲最強球隊的曼城，作客欣逢乙組代表紐波特郡。睇牌面，這是一場絕對冇得鍊的賽事，而筆者深信現實亦必會如此。回看曼城近期本土盃賽頻炒對手，表現毫無欺場，縱然讓至3球，上盤仍然值得秤先一線。
曼城名帥哥迪奧拿曾表示曼城不會視本土盃賽為雞肋，明顯是暗寸於聯賽盃及足總盃早早出局的利物浦領隊高普。不過哥迪奧拿又的確言出必行，他們在過去4場本土盃賽，包括聯賽盃及足總盃，取得4連勝的無敵戰績，而且總共轟入22球之多，平均每場入近6球，是真正的遇神殺神。
或者你會話，唔係喎，曼城於聯賽盃4強次回合派晒青年軍上陣，只係1球小勝伯頓咋喎！大佬，咁梗係啦，因為曼城首回合已經贏到9球咁多吖嘛，唔通次回合仲唔留力咩！
回看這幾場比賽，除了剛提到的伯頓之役，其餘3仗曼城縱有留力，都派出頗多主將應戰。如上一圈5球大勝般尼為例，落場的正選11人都是主力，包括門將艾達臣、比利時天王奇雲迪布尼，以及阿爾及利亞國寶馬列斯都有落場；而再回顧第3圈7球狂炒洛達咸，陣容也是大同小異，不過小將菲爾科頓則獲得正選機會。
個人認為，哥迪奧拿心中已經有一套陣容應付本土盃賽，相信奇雲迪布尼、根度簡及菲爾科頓會繼續在今仗擔正，或者在門將位置上亦可能有變動，但他們肯定不會派出以青年軍為主的人腳。
主場的紐波特郡在英乙都要食塵，目前排緊第十四位，考慮到曼城上仗以6球蹂躝車路士，他們已是當今世界最強球會之一幾乎不會有人懷疑，雙方實力差六、七班下，客軍讓得多可以照炒。