早前明星賽舉行，筆者直斥巧立名目的新制度極討厭，可能會有讀者覺得，小弟靠寫NBA搵食，鬧咁多把鬼咩，專心貼波好過啦。不過筆者性格就是這樣，睇唔過眼就會出聲，而且新制唔掂就係唔掂，連NBA揸弗人施華日前亦表示，明星賽改革是毫無效果。
於2014年接替被譽為NBA營銷之神史特恩總裁崗位的施華，勇於承認自己對明星賽的所謂改革全盤失敗，他並表示正考慮參考足球盛事歐聯的成功之處，在未來以季中的海外錦標賽，取代收視率一年不如一年的明星賽。
史特恩掌權期間，很幸運地聯盟出現了米高佐敦、四大中鋒、奧尼爾、高比拜仁及勒邦占士這些歷史級別巨星，時勢造英雄；到施華接手時，NBA已由高峰滑落了，筆者認為他怎樣扭盡六壬，也難阻止跌勢，簡單點講就是吃力不討好。情況就好似香港娛樂圈，全盛期有張國榮、家駒、紅姑這些天皇巨星；而家？數來都嘥氣啦。
明日常規賽上演兩場賽事，密爾沃基公鹿會於主場迎戰印第安納溜馬，前者昨日倒灶後，被西岸的金州勇士愈追愈近，為了力保常規賽一哥之位，戰意毋須懷疑。反觀溜馬有奧拉迪波提早收咧，整體實力明顯削弱，作客不易爆冷。