昔日市井術語有云︰左手伸一伸，貴過你全身。意即單計腕上名表，都比其他人的衫褲鞋襪加起來更昂貴，多於暴發戶或有背景人士之間流傳。
不過今時今日，閒閒哋一隻勞力士都十萬八萬，貴過人全身，又豈足曬命？除非好似葡萄牙球王C朗咁啦，左手伸一伸，貴過你副身家，就咁真係巴之閉勒！
話說C朗暑假周遊列國渡假，少不免在社交媒體上傳照片向粉絲呃Like。有英國傳媒發現C朗每次現身，腕上皆戴上不同款式牌子的名表，勞呀、刁（TUDOR）呀……，日日唔同款。當你以為自己戴隻十零萬地通拿高人一等兼有品味的時候，C朗的最新玩具是HUBLOT雙軸陀飛輪特別版名表，鑲上逾百粒鑽石，價值高達逾800萬葡幣（澳門元），恰恰是一個單位的價錢。而且仲要有錢都冇得買喎，因為是HUBLOT為C朗訂製的獨一無二版本。
提到運動員炫富，白頭沈想起一個故事。
話說九十年代，向以牙尖嘴利見稱的NBA殿堂控衛披頓，一直看波神米高佐敦不爽。有次賽前雙方於停車場巧遇，披頓向佐敦說︰你睇吓，我都買咗你部林寶堅尼啦，有咩咁巴閉呀！此時波神只是淡然道︰啊，我果部唔係買架，係林寶堅尼送畀我架。披頓當堂語窒。