德州撲克熱潮近年風靡全球，澳門不少賭場皆有設局，更不時會搞比賽，吸引國際好手參戰，頗受矚目。白頭沈明明係講波佬，啤牌關我乜事？話又唔係咁講嘅，因為德州熱潮席捲球壇已持之有年，不少大家耳熟能詳的名將，甚至已達啤王級數。
在西甲開鑼戰落筆打三更的巴塞，翌仗大炒貝迪斯止跌後，兩位主將碧基及維達爾便一同參加了著名的撲克之星（PokerStars）巴塞站巡迴賽，而且均獲得好成績，維達爾奪得第五名，而碧基更一舉獲得亞軍兼35萬歐元獎金。
約莫300萬葡幣，對於打工皇帝且富二代出身的碧基而言，當然是微不足道，但這足以反映他的啤癮甚深，視德州撲克為工餘興趣。據碧基的父親所講，碧基智商高達170，唔怪得咁鍾意於賭枱鍛鍊腦筋。
其他擅長操啤的球星，尚有葡萄牙球王C朗、巴西天王尼馬，兩人搵錢比碧基更多，閒時玩兩手純為娛樂而已。至於退役球員當中，前球王大哨朗拿度是著名的德州fans，而且進軍職業賽有不俗成績。2014年，大哨與網球泥地王拿度便合演了一場慈善啤王大賽，勝出的拿度將5萬美元獎金捐作慈善用途，娛己兼可助人，好事。而大哨據聞唔服輸，向拿度再下戰書，則已是後話矣！