除了歐國盃外，國際賽期間尚有不少友賽舉行，其中南美雙雄智利及阿根廷，明早便會於美國加州拍跳。近年淪為糖衣毒藥的阿根廷，亂局仍然未平息，成熱門並不值博，寧秤先智利一線。
美斯之前彈出彈入，宣布退出國家隊後又收回成命，無非只是希望取得國際大賽冠軍，為自己的獎盃櫃集齊最後一塊併圖。
可惜阿根廷依然唔爭氣，去年世界盃16強止步，今夏美洲盃則屈居季軍，賽後美斯更因為批評南美足總，而遭到停賽3個月處分，真是天王都冇面畀。
美斯本身有傷在身，縱非停賽令，今仗亦無緣上陣。但值得留意的是，阿根廷似有剷除親美斯勢力的部署，如今次便刻意沒有挑選其沙煲兄弟阿古路，用意可謂相當明顯。
偏偏，阿古路是目前阿根廷最弗的球員，他在英超4輪轟入6球，咁好的球員都唔揀，根本就是阿根廷亂象的延續。
白頭沈估計，相信要待美斯掛靴後，阿根廷的問題才有機會收科，屆時還須看足總官員是否有撥亂反正的魄力，如果在位者又是圍威喂掛住搵水，用人唯親黑白不分，一代南美足球王朝就此沒落，又有何稀奇。