明日NBA常規賽上演多達11場賽事，由班霸淪為魚腩的金州勇士，將會哀兵作客達拉斯獨行俠。勇士昔日也文也武，如今家道中落當然人人喊打，7連敗反映球隊劣勢難挽，今仗可秤先主隊一線。
季前杜蘭特離隊，以及得分後衛湯臣事先張揚因傷整季缺陣，早已預示了勇士霸權的淪喪。然而屋漏兼逢連夜雨，開季不足1星期，被視為隊史最佳球員的史提芬居里不慎骨折，需要久休4個月，運氣可講衰到貼地。
目前的勇士並非不夠班咁簡單，而是要湊夠上陣人數也成問題，如日前7連敗不敵鵜鶘一役，便可見後備席將多過兵（職員多過球員）的尷尬情況。筆者夠膽斷言，即使出現九星連珠的奇跡，今季勇士也肯定無緣季後賽。
過去仗著史提芬居里、湯臣及杜蘭特等人的威風，大前鋒格連當正自己是大阿哥，人人都要畀面。不過潮退了才知道誰在裸泳，格連今季獨挑大樑，居然只交出8.8分、7.1個籃板球及4.8次助攻的可笑數據，莫說是球星，根本連二打六也不如。
須知道格連已是目前這隊甩皮甩骨勇士的頭牌球員，擁有無限的開火權，任射唔嬲，得分竟還可以不上雙（位數）。咁都當自己是巨星，佢知唔知醜架？