歐聯E組爆發榜首大戰，上屆冠軍「紅軍」利物浦迎戰小組2哥拿玻里。紅軍尚未肯定取得16強席位，今場仍要全力爭勝，不過紅軍今季主場比賽場場有失波，後防唔算太穩陣，讓一球、球半略嫌太多，轉捧2.5球大更划算。
（myTV Gold 303、Now 643、有線616及656台周四凌晨4時直播）
現時E組形勢，紅軍4戰得9分排榜首，拿玻里以8分緊隨其後，薩爾斯堡則有4分排第3；紅軍今場贏波便可提早一輪出線16強，如果和波，薩爾斯堡喺另一邊廂擊敗亨克，紅軍同薩爾斯堡差距將會縮窄至3分，由於紅軍最後一輪分組賽將會作客薩爾斯堡，為免夜長夢多，紅軍當然希望贏波提早達標。
鬥拿玻里邊隊贏都出線
由前屆附加賽開始起計，紅軍已經連續15場歐聯主場未輸過，而且今季喺各項賽事9場主場亦攞得8勝1和，主場水準好穩定，不過睇番佢哋呢9場主場比賽全部有失波，加埋失15球，就算唔計英聯盃出副選打和阿仙奴5比5，其餘時間一眾後防球員表現亦唔算合格。拿玻里今屆分組賽4戰未輸過，論穩定性唔會輸蝕畀紅軍，而且拿玻里今場贏波一樣可以提早出線，相信作客唔會打守勢波；既然紅軍今屆分組賽主場鬥薩爾斯堡、亨克都係贏一粒，以今場讓一球、球半盤口去計都係贏波輸盤，呢場上盤值博率唔高，建議熱捧2.5球入球大仲穩陣。