艾美利保飯碗唔衰得
今晚歐霸盃F組第5輪大戰，「1哥」阿仙奴主場迎戰「3哥」法蘭克福。阿仙奴近況堅曳，令主帥艾美利備受壓力，為保帥位點都要贏番場爭氣波，而且近7次歐霸主場出擊贏晒，今仗勢搵法蘭克福做炮灰博反彈，主勝捧得過。
（myTV Gold 303、now 643、有線656及616台周五凌晨4時直播）
阿仙奴真係頭頭碰着黑，各項賽事連續6場未贏過，包括上場聯賽以2比2僅和護級球隊修咸頓，上輪歐霸則喺末段畀甘馬雷斯逼和1比1，唔單止畀球迷鬧爆，亦有傳高層開始考慮換帥（見另文），主帥艾美利都咪話唔驚。
好彩艾帥一向擅打歐霸盃，今屆頭4戰取得3勝1和，目前阿仙奴喺F組位列榜首，領先標準列治及法蘭克福4分，出線機會高唱入雲，若果單計近7次歐霸主場出擊，更錄得全勝，可見佢哋嘅級數喺歐霸仍屬超班之列。
法蘭克福星散走晒樣
法蘭克福乃上屆歐霸4強分子，可惜今夏流失大量主力，戰鬥力大幅下滑，今屆歐霸頭4輪只得2勝2負，包括首輪主場慘吞阿仙奴3蛋，上輪被標準列治2比1絕殺被追到同分。睇番呢支德甲球隊客場特衰，連同歐霸外及聯賽在內，近9場作客只得3勝6負，所贏嘅只係甘馬雷斯、柏林聯及聖保利等弱旅，今場造訪急欲反彈嘅阿仙奴難偷雞，主勝有計。