2019年英超最後一輪比賽，寸王摩連奴率領熱刺揮軍諾域治。作客的熱刺上仗雖有孫興民停賽，但仍以2：1反勝白禮頓成功止跌，今面對已見晒底的金絲雀，上盤力足再下一城。
兩隊都是48小時內踢第二場比賽，對此，白頭沈又要老調重彈，批評賽會的安排了。
為市民撰稿近20年，每逢聖誕新年，我都會鬧英國足總一次，因為他們的賽程之頻密已近乎不人道。即使今季英超首次引入歇冬期，卻是歐洲主流聯賽最短的歇冬，只得區區1個星期的時間，而且更有傳足總希望之前赴中東踢世冠盃的利物浦，於該段時間作出補賽，如屬實即是紅軍冇得唞，成績好反而被懲罰。
或者看倌會話，你識咩吖老嘢，過時過節有波睇有波賭，唔好咩？不過白頭沈就係咁膚淺的了，每逢佳節倍思親，畀球員自己揀，邊個想喺呢啲日子舟車勞頓呢？對於呢頭踢完，嗰頭又踢的情況，被視為當今兩位最佳主帥的高普及哥迪奧拿日前相繼發聲，齊向魔鬼賽程說不。而深受球迷愛戴的奧脫福大帝簡東拿，早前亦不諱言現時比賽泛濫，令他懶得打開電視機。
八、九十年代，資訊冇咁發達，球迷好難先有機會欣賞外國賽事直播。而家，多到你唔睇了。不過為咗錢，比賽只會不停增加，嚟緊歐洲足協將會開辦歐聯、歐霸盃以外的第三項混戰式比賽UEFA Europa Conference League（姑且稱作歐霸聯），2021年正式上馬。
白頭沈贈佢4個大字︰過猶不及。