今晚熱門︰比利時、葡萄牙及法國

歐洲國家聯賽繼續開快車，今晚白頭沈推介三大熱門︰比利時、葡萄牙及法國。其中葡萄牙上仗以4：1大炒世界盃亞軍克羅地亞，就算球王C朗繼續倦勤，但面對今非昔心的瑞典勝望仍濃，讓平半上盤去馬。

上仗主場鬥格仔兵團，冇傷冇病的C朗只作壁上觀，讓球迷相當意外，期間更因為冇戴口罩做壞榜樣，在工作人員勸喻下戴回。這位葡萄牙球王一向求戰欲驚人，如果早知未能披甲，不會勞師動眾做啦啦隊，倒不如趁休季唞多兩日。原來C朗在迎戰克羅地亞前，罕有地被蜜蜂螫傷腳趾而發炎，今晚能否趕及披甲也只是五五波。

儘管C朗未必上陣，但白頭沈對葡萄牙連捷仍相當樂觀，一來瑞典進入後伊巴謙莫域時代，群龍無首；二來葡萄牙眾將已經在上仗證明，即使大哥大缺席，他們也懂得贏波。

10年前，C朗在國家隊常有孤掌難鳴之嘆，不過如今葡萄牙陣容已全面升級，金童祖奧菲歷斯上仗有士哥，中場則有新奧脫福大帝般奴費南迪斯坐鎮，加上貝拿度施華、魯賓戴亞斯、魯賓尼維斯等猛將，依然是歐洲其中一支陣容最龐大的戰隊。

另一場值得一揀的，是比利時主場迎戰冰島，去季英超最佳球員奇雲迪布尼，榮升第三任爸爸後陪產完畢歸隊，令歐洲紅魔的人腳更完整。有睇開此欄的讀者，都應該知道白頭沈是比利時的忠實支持者，這支具備奪世盃實力的勁旅可望輕取對手。