曼聯嘅法國球星保羅普巴呢排去咗美國度假，玩到不亦樂乎，日前同當時等緊「入魔」嘅盧卡古喺比華利山開瘋狂party之外，星期日更加喺個人Instagram上載咗同美國巨人隊球星Odell Beckham Jr.喺加州嘅主題樂園「六旗魔術山」準備玩過山車之前喺車上面玩到癲嘅短片，另外，普巴最近亦同一位金髮索女經常一齊，唔知係咪佢嘅「真命天女」，不過普巴被爆喺LA用歐元買花仲畀少錢㖭！
最近接受《君子》雜誌訪問話自己冇女朋友嘅普巴，日前畀人影到喺UCLA嘅運動場同一位金髮女郎互相調情，之後普巴仲帶咗呢位索女去荷李活好受明星歡迎嘅餐廳Tao一齊晚飯，又幫襯咗一位喺街頭賣花嘅女士送玫瑰花畀身邊呢位未知咩身份嘅金髮女。不過據賣花畀普巴嘅女士透露，佢同普巴講啲玫瑰係5蚊美金（約39蚊港幣）一枝，但普巴買三枝花就只畀咗10蚊歐元佢。首先喺美國買嘢就冇理由用歐元啦，其次係10蚊歐元即係大約港幣89蚊，計起條數即係畀少咗28蚊，估唔到舊年以8,900萬鎊加盟曼聯嘅呢位法國球星原來係個Cheap精囉！