新魔獸原來想去車仔

講番轉會，曼聯上周六宣佈，已經同愛華頓達成轉會費協議，只待盧卡古完成體測及傾妥個人條款，就會落實加盟。官方冇公佈收購呢位24歲比利時前鋒嘅代價，英國《BBC》就估計，轉會費高達7,500萬鎊（約7.5億港元），另有1,500萬鎊附加條款，盧卡古將會係繼曼聯中場保羅普巴後，英超第二高轉會費球員。
拉奧拿為私利拒車仔
原來到上周五，車路士都仲未心息，向愛華頓開出同曼聯一樣嘅7,500萬鎊，而且深信盧卡古同拉奧拿意見分歧，前者係屬意重返史丹福橋。不過，由於曼聯願意喺呢次交易畀約1,000萬鎊拉奧拿，反觀車仔唔肯，所以拉奧拿梗係游說盧卡古入「魔」啦。
曼聯簽到心頭好都可以話係大贏家，拉奧拿就肯定係第二贏家，連埋轉會費抽佣，佢喺呢單deal至少執到2,000萬鎊。愛華頓就可以話係第三贏家，事關佢哋2014年以2,800萬鎊從車仔收購盧卡古，踢三季就賺近5,000萬鎊，難怪今夏可以咁豪增兵。
車路士就真係大輸家喇，迪亞高哥斯達扭計走人，盧卡古又買唔到，季初仲有夏薩特受傷，所以𠵱家除咗加緊收購艾華路莫拉達、比洛迪等前鋒之外，據報仲將收購目標擴大到皇馬嘅哥倫比亞中場占士洛迪古斯。占士已經冇咗正選位，皇馬如果收到5,200萬鎊轉會費就會放人。