英超返嚟喇！ 喺「渴」咗几个月之后，英超2017-18赛季终于即将揭开神秘面纱，而看点十足依旧系英超嘅四字真言。喺冠军争夺上，干地领军嘅卫冕冠军车路士自然希望再尝冠军芳泽；曼市双雄今夏再度升级班底，司马昭之心可谓路人皆知；另一边厢，阿仙奴与热刺呢对伦敦死敌喺基本留下核心班底嘅情况下亦绝对不容忽视；就算系默西赛德郡双雄都渴望迎嚟突破；至于保组区亦同样竞争残酷，谁能成为最后嘅幸运儿逃出生天同样值得关注。所以话，如此魅力十足嘅2017-18英超新赛季又岂能错过！
枪手狐狸率先亮相
今季英超揭幕战将在礼拜六凌晨于酋长球场拉开帷幕，两位主角分别为主队阿仙奴与李斯特城。自从2015-16赛季上演夺冠神话后，狐狸喺上季已经被迅速打回原形，虽然今夏为重振声威亦有引进如伊恩拿祖等好手，奈何球队成名三板斧套路已经被世人所熟知，佢哋今季想要恢复前季荣光确实难过登天；至于枪手，喺经历一段长时间嘅肥皂剧后，阿历斯山齐士和奥斯尔喺新赛季都如无意外会留守，虽然二人心情未必靓仔，但系重金购入法国射手拿卡锡迪后，枪手如今实力肯定唔会只满足于重返前四。毕竟领队云格早已放风，球队今季重心肯定会摆喺联赛，欧霸杯就随缘。正所谓念念不忘必有回响，上季专心应付联赛嘅车仔或者将会成为枪手一个参考对象。
争冠前景扑朔迷离
不过讲到冠军争夺，今季英超又点会只得枪手一位候选人。首先曼市双雄喺今夏转会市场动作频频，其中曼城成功改造后防线，B.文迪、丹尼路雷斯、基尔获加和艾达臣嘅纷纷来投令哥迪奥拿嘅球队渐趋完美，外界呼声亦都最高；至于红魔鬼则分别对三条线作出针对性嘅补强，连迪路夫、马迪和卢卡古皆即战力十足，而且国际米兰左翼比列锡亦被传好事近，加上众所周知摩连奴执教一支球队第二季往往就会称霸联赛，一众红魔鬼拥趸自然希望美梦重现；当然卫冕冠军车仔亦不得不提，佢哋喺今夏同样收获如巴卡约高和摩拉达等强援，不过今季既要重新面临欧冠赛事嘅考验外，主帅干地与射手迪亚高哥斯达嘅矛盾更加迟迟未见有解决迹象，队内不和谐声音随时会变成一个计时炸弹。至于默西赛德郡双雄，论牌面其实双方都绝对有能力喺今季英超带嚟惊喜。不过利物浦如今正被巴塞挖紧墙角，传言目标对象菲腊比古天奴更加已经情归巴塞，而有睇过红军今夏英超亚洲行(香港站)嘅波友都应该明白，呢位巴西中场如今绝对系红军攻击线核心，一旦离队恐怕克洛普嘅复兴大计都会满盘皆落索。与此同时，爱华顿于今夏转会市场同样展露出意图胜天半子嘅雄心，但经验或将成为佢哋嘅绊脚石，朗奴高文可谓系任重而道远；至于近年青春风暴越演越烈嘅热刺，整体实力绝对无得弹，但每年都感觉系差咗道气，未知今年能否一扫阴霾。
生存之旅戏码十足
当然英超精彩并不仅仅局限于争冠戏码，每年嘅保组生存大战同样惊心动魄。而今季最容易被卷入降班漩涡嘅则恐怕非般尼、哈德斯菲尔德和白礼顿莫属。其中前者上季已经危危乎，今夏亦未有大手笔引援，相反更加有进攻好手安祖格雷离队等噩耗，佢哋嘅保组之路注定要从第一轮随即开始；至于后两者则都贵为升班马，上季虽然皆能够喺英冠赛场谈笑风生，但今季面对水准截然不同嘅英超赛场，缺乏底蕴兼且实力未见突出嘅哈德斯菲尔德和白礼顿恐怕会感到度日如年；当然另一支升班马纽卡素亦并非全无隐忧，由于引援力度不足，心仪对象无一得手，星级领队宾尼迪斯早前已经公开向球队管理层施压。但肥宾始终系有料之人，相信喜鹊有肥宾，保组有信心。