土耳其小姐做女友 奧燒堅幸福
周中冇波踢，趁季初賽程未算頻密，阿仙奴球星奧斯爾就拖埋女友Amine Gulse去鬧市午膳，仲出動埋珍藏嘅白色林寶堅尼接載。美人配靚車，羨慕死人咩？
曾有花花公子之稱嘅奧斯爾，兩年前搵到真愛，同前土耳其小姐Amine Gulse撻著，之後兩人亦打得火熱，上年更傳出佢哋已經秘密結婚，但呢位德國球星隨後已經否認。不過，球迷唔使為大眼仔擔心，因為佢兩個關係仍然冇變，而周三中午就畀傳媒拍到兩人去咗倫敦嘅一間土耳其餐廳食lunch。
奧斯爾呢日放假，唔使返球會操練，就揀咗架靚靚林寶堅尼炫耀一下，戴上一副黑超配白衫白褲，而女友就一身黑色緊身top打扮，最緊要有露膊，密實得嚟又帶幾分性感。一行出嚟已經sharp爆成條街，途人好難唔將焦點放喺呢對情侶身上。
早前放暑假期間，奧斯爾亦帶埋女友去外地享受陽光海灘，仲經常喺IG放閃。