摩连奴肩负起带领红魔鬼重返巅峰嘅重任。
红魔鬼全队上下如今空前团结。 受累于近年帅位频繁变动，球队战绩始终未能恢复至外界期望，曼联一度被讽刺为如今仅可以赢到商业市场。但喺个性教头摩连奴上季正式驾临奥脱福球场后，连捧英联杯及欧霸杯已经显露出重返正轨嘅小苗头。而喺今季英超头2轮赛事中，连续向韦斯咸和史云斯派发四蛋更加「魔」性尽现。正所谓喺边度跌低就喺边度企返起身，虽然联赛仍然仲有36轮，但红魔鬼已经用完美开局同一众争冠份子Say Hello！
完美开局平息质疑
如果有关注红魔鬼头2场联赛嘅粉丝，相信脑海中都会有一种感觉：返晒嚟喇！皆因喺当年费Sir领军岁月中，入波从来都唔系红魔鬼需要担心嘅问题，但自从上季因为食糊能力过于平庸，无奈成为最热爱和平嘅队伍，加上伊巴谦莫域又因伤离队，红魔鬼进攻火力一度相当令人担心。但头2轮两个4比0嘅赛果，系继1907-08赛季以嚟，佢哋第一次喺赛季前两轮攻入8波，同时亦足以令到外界质疑声烟消云散。其中今夏重金买入嘅新9号卢卡古可谓完美融入摩连奴嘅战术体系当中，而2轮联赛3个入波嘅成绩单相信只系啱啱开始；与此同时，对摩连奴誓死相随嘅中场屏障马迪喺头2轮赛事中进可攻退可守，如此全面嘅表现亦令到上季成功上位嘅安达靴里拉已经沦为后备；至于上季饱受质疑嘅米希达恩和保罗普巴则全面爆发，前者尽显当年德甲MVP嘅风采，而后者则用表现证明转会身价1.05亿欧元或者其实只够买佢一只脚；甚至曾经每场最为忙碌嘅门神迪基亚如今都毅然成为场上存在感最低嘅球员；不过更加令人振奋嘅系，红魔鬼如今所有将士都相当自信，而且相比起利物浦、车路士和阿仙奴如今队内矛盾重重，红魔鬼目前可谓空前团结，所有人都展露出可以为球队抛头颅洒热血嘅激情。而同2轮全取6分相比，红魔鬼重新搵返呢啲一往无前嘅态度显然更加重要。
「魔」性重现不再低调
当然有波友亦都指出，红魔鬼上季更加头3轮联赛都赢晒，最后咪又系得个吉。但暂且不提摩连奴喺过往执教生涯中，带一班波喺第二个赛季一般会攞到乜战绩。单从过去呢两个夏季转会期，摩连奴对症下药嘅引援已经令到球队漏洞得到最大程度嘅修补，而随著一代旗帜朗尼今夏嘅离队，成功更新换代嘅红魔鬼如今踢法已经刻有摩连奴浓浓嘅烙印，而简洁实用嘅反击战术目前嚟睇仍然可以喺英超赛场上奏效。与此同时，伤势恢复进度良好嘅伊巴谦莫域近日亦传出即将与红魔鬼重新签约征战下半季赛事，一旦成真，对于今季需要应付多线作战嘅佢哋嚟讲绝对系一大利好。当然红魔鬼如今距离无懈可击尚有一大段差距，诸如卢卡古能否喺关键赛事有好表现等问题尚需时间解答，而且随著欧冠分组赛日益临近，一周单赛嘅美好时光亦将会一去不复返。不过饭当然要一口口食，路亦都要一步步咁走，对于「魔」性重现嘅红魔鬼嚟讲，如今确实睇到咗重拾过往荣光嘅希望，而能否美梦成真就真系需要拭目而待。