屈福特一众将士如今士气高涨。
马高施华的确有料到。 喺国家队比赛日之后，各国联赛又紧锣密鼓而至，而备受关注嘅英超喺本周末已经嚟到第四轮，系人系鬼已经开始有所眉目。不过睇返积分榜，撇除另一匹黑马哈德斯菲尔德尚未现身本轮赛事之外，4轮过后排名前四嘅除咗有曼市双雄同车仔呢啲熟口熟面嘅豪门外，素有黄蜂之称嘅屈福特意外现身就令人惊喜之余亦带有疑问，究竟呢班黄蜂军团有乜法术加持？
与上季同期相比(上季头4轮攞4分)，今季胜和各两场取得8分明显有咗阶级式进步，其中喺上季两位苦主利物浦和修咸顿身上攞到4分更加令人刮目相看。屈福特能够异军突起，有摩连奴二世之称嘅主帅马高施华应记一功，喺呢位少帅嘅调教下，球队阵式灵活多变，无论4-3-3定4-5-1阵式喺头4轮联赛都有亮眼之处。与此同时，马高施华睇餸食饭嘅能力亦颇为值得称道，喺队内星味不足嘅情况下，佢成功将队波捏合成型，而且如中坚米基比图斯、普特尔、中场杜哥尼、奇华利和锋线新星李察列臣等一批此前已经被外界挂住逐渐过气、豪门弃将和潜力一般等标签嘅球员焕发光辉，喺攻守两端都贡献出满意答卷。俗语有云，事不过三，屈福特喺4轮过后仲可以Keep住道气，证明黄蜂乱舞绝不离谱。
不过点讲都好，目前只喺9月份，一切都为时尚早。而且屈福特想要一黑到底，甚至重演李斯特城夺冠奇迹嘅话，单凭头4轮联赛表现显然未够。与此同时，虽然马高施华成功喺有限嘅人手资源上拼凑出一套行之有效嘅战术打法，但薄弱嘅班底始终系一个计时炸弹。一旦核心将士遭遇伤病来袭，球队走向或将会迎来翻天覆地嘅改变。与此同时，经验上嘅缺失亦显然系一个致命伤，毕竟动物再凶猛，都会难逃狡猾嘅猎人法网。不过做人最紧要信，如果连梦想都唔敢有又谈何实现。嚟紧下一轮联赛迎接屈福特嘅将会系开季恶到不得了嘅争冠大热门曼城，究竟黄蜂军团有几斤几两，9月16号晚上22点约定大家喺M直播一齐见证。