简拿华路(右)今铺重返天河可谓困难重重。 对于广州恒大拥趸嚟讲，近期喜事真系一浪接一浪，球队啱啱先喺中超赛场笑到最后，连续7季将冠军奖杯留喺羊城；继而意籍教头简拿华路于寻日获正式确认以一份5年长约重返天河。不过随住球队经营理念嘅逐渐改变，简拿华路此番二进宫嘅前景恐怕并非一路平坦。
正所谓冥冥中自有天意，喺2015年年中带队战和天津泰达惨被「就地正法」后，接过天津权健教鞭嘅简拿华路不仅带队战绩优异，更加喺本季最后一轮联赛当中带队攻陷天河体育中心。除咗让权健喜获来季亚冠资格嘅同时，亦令恒大最终选择食回头草。而作为中超多年嘅霸主，恒大喺帅位上选择简拿华路接棒，首先当然不得不提呢位少帅嘅人格魅力，毕竟当年首次执教恒大时，球队内部极为融洽，个别嫡系弟子更加唯佢马首是瞻。对于处于转型期嘅恒大而言，稳定先系如今首要考虑。而喺引援力度越嚟越细，投资愈发手紧嘅背景之下，就连班主许家印都一再强调2020年要实现全华班嘅目标，善于培养新人嘅简拿华路就无疑正对胃口。喺佢嘅栽培之下，权健队内如刘奕鸣和郑达伦等新星都喺今季崭露头角。加上随住中超U23政策进一步收紧，青年才俊嘅重要性就更加凸显，喺呢方面，简拿华路确实毫无疑问系一个好选择。
但作为中超最成功嘅球队，外界对于恒大期望显然与众不同，而且班主许家印亦于日前立下军令状，来季要实现中超八连冠及再夺亚冠杯。不过喺如今呢个中超金元时代，恒大引援力度已经大不如前，而一众功勋球员冯潇霆、黄博文、郑智和郜林皆又大一岁，张琳芃和高拉特又被传有离意，甚至今季返嚟救火嘅穆里奇都已经疑似发表离队宣言。而喺夺冠班底逐渐瓦解之时，被寄予厚望嘅一众后生仔如王上源、廖力生和徐新亦迟迟未有展现出能够独当一面嘅能力，其中发挥异常差劲嘅王上源喺球队赛季最后一战更加惨遭天河主场球迷漫天嘘声招呼。显然，恒大喺新赛季或将不再系曾经嘅中超银河舰队，简拿华路能否带队续享荣光征服天河就真系值得关注。