保亚斯离开上港恐怕只系时间问题。 随住球证一声哨响，作为本年度中国足坛压轴大戏嘅中国足协杯决赛第二回合喺昨晚于上海八万人体育场正式埋尾。对于上海滩如今究竟属于「蓝色」定系「红色」嘅问题，亦随住素有蓝魔之称嘅上海申花嘅夺冠从而得到解答。而呢个夜晚对于上海上港注定既苦涩又漫长，季初一度豪言要赢尽一切嘅佢哋最终落得四大皆空嘅惨淡收场。正如坊间好多失意人士都会被睇相佬批天命本该如此，或者上港亦同样难违宿命。
二奶命确实邪
自从2015-16赛季开始上港管理层持续大开水喉，球队外援配置亦一路升级，嚟到本赛季，上港由侯克、艾杰臣、奥斯卡和阿美杜夫所组成嘅前场外援组合即使放眼全亚洲都可算数一数二。与此同时，武磊、傅欢和颜骏凌等本土姜亦都系国家队常客，实力绝不简单。但水涨船高嘅巨额班费却始终未能带来冠军，尤其系今年喺亚冠及中国足协杯皆突破心魔广州恒大分别杀入至准决赛及决赛后，却始终喺临门一脚挞Q，导致今年继续食白果，而季初嘅一番豪言壮语亦最终沦为笑柄。更为悬疑嘅系，喺联赛三年两亚嘅悲壮情况下，上港今年喺被中国足协处罚罚金榜上亦排名第二(共计58.8万元人仔)，仅次于班霸恒大(共计61.3万元人仔)。如此二奶宿命，你都咪话唔邪。
死胡同被玩谢
喺接连烧钱仍然未能得到满意回报嘅情况下，上港主帅保亚斯相信会系首当其冲嘅替罪羔羊。毕竟喺拥有如此亚洲一流嘅牌面下，这位葡萄牙少帅却未能带队完成任务。而且其过于固执单一嘅人脚使用亦令到队内正选与后备球员隔阂频现，直接使球队精神层面更似一只纸老虎，因此亦不难解释上港喺关键战役上为何屡屡发软蹄。而保亚斯亦自知在上港时日无多，据知情人士透露，这位少帅已经喺球队痛失中国足协杯冠军赛后于休息室与球员道别，离开上港乃至中国恐怕只系时间问题。虽然歌仔都有得唱「阳光总在风雨后，请相信有彩虹」，但喺中超外援及U23球员政策皆持续收紧之下，各队近年连番嘅无底洞军备竞赛势必会大受影响，上港想再升级外援配置恐怕会难上加难。而究竟上港何时能够从无冠军-引援-无冠军-引援嘅死循环中走出嚟，乃至佢哋究竟仲有几多耐性面对一次次嘅失望都系一大疑问。