夏萨特需要带领车仔尽快走出困境。 赛季至今，英超卫冕冠军车路士表现每况愈下，作为10号波衫主人兼队内大腿之一，比利时球星夏萨特如今肯定倍感煎熬。不过大胆一谂，如果我系夏萨特，究竟如今会有乜谂法？
作为卫冕冠军，如果同你哋讲当赛季进行到26轮时，车仔竟然落后领头羊曼城接近20分，想必会觉得系天方夜谭。但现实往往比想像中更残酷，职业赛场上亦从来唔会见到怜悯两个字。我并非交唔到功课，喺啱啱1比4惨败予屈福特嘅赛事就正正系我攻入挽回面子嘅一波。但连续2轮联赛以大比数不敌中游队伍，球队肯定系深陷麻烦当中。更为闭翳嘅系，与过往相比，我今季喺比赛中踢得极其辛苦，防守中场马迪嘅离去令到强如简迪都无法再完全覆盖到所有防守漏洞；而韦利安等曾经嘅好帮手依家越踢越沉，令到我往往陷入孤掌难鸣嘅无奈。当然我知道你哋会提球队其实都进补咗唔少新血，但好似巴卡约高咁嘅表现，真系想讲一句：「Are you kidding me？」
不过车仔如今最大问题都唔系上述呢啲。
虽然话每位领队都有自己嘅个性，作为球员主动去适应就系最好嘅应对方式，但干地今季开始变咗，从上季与管理层相亲相爱变到如今彼此间矛盾日日见报，佢不满引援，同车仔「旧爱」摩连奴唇枪舌剑等都令人「刮目相看」。干地曾经同大家表明想成为车仔教父级嘅人物，但喺战绩遭遇寒冬嘅情况下，我哋所有队员就连球队下季是否继续姓干都开始答唔出。其实干地带队能力大家有目共睹，车仔今季若想保住前四获得来届欧冠资格亦自然少不了前者嘅领军。但若果佢同管理层嘅博弈继续落去，车仔今季真系会危危乎。
至于我嘅未来？虽然曾经表态愿意留守车仔，但做人总要向前望，如果球队战绩及投入力度未如人意，西甲赛场或者曼城嘅阿提哈德球场想必会系美妙嘅落脚点。
(本文纯属虚构)