欧冠八强球队皆为捧杯严阵以待。 每年嚟到呢个时候，相信广大波友最关注嘅足球赛事依然系欧冠，唔少人包括笔者认为，相比起决赛或者准决赛，八强往往系最吸引眼球嘅环节，因为欧冠本身嘅睇头就系唔同联赛嘅顶级球队一决高下，而呢个阶段啱好最大化满足咗大家嘅胃口。随住日前抽签结果出炉，唔少观众发出咗唔满意嘅声音，觉得唔够刺激，究竟事实系咪咁呢？下列就由笔者发表一啲各组对决嘅愚见。
红蓝军团笑赢红狼
单从牌面嚟睇，拥有美斯嘅巴塞始终系最具竞争力嘅球队，阿根廷球王喺十六强两回合嘅个人show话畀人听自己年过而立依然屹立巅峰。睇翻晋级历程，其实都咪话巴塞签运好，分组赛就有祖记相伴，十六强就同「老友」车仔会面(两队分别系上季意甲同英超联赛冠军)，而红蓝军团照样无风无浪杀入八强，尽显夺冠大热本色。正所谓时来运到，过咗两个难关，轮都轮到自己执翻啲笋嘢喇啩。我听到有唔少声音系话「欧足联阴谋论保送巴塞入四强」，谂深一层，如果巴塞喺呢round同曼城、皇马或者拜仁相遇，巴塞拥趸会冇怨言？
相比之下，从分组赛开始罗马就被定位成陪跑嘅角色，皆因佢哋当时分咗同马体会仲有车仔一组，点知最尾头名出线，真系畀咗唔少惊喜大家，十六强能够遇到实力偏弱嘅萨克达都算系个天奖励翻佢哋。至于嚟到八强，相信除咗西维尔，罗马对住另外6队都系处于下风，所以真系唔洗怨。要同巴塞硬撼真系唔实际，特别系面对咁高质素嘅传控打法，等一次反击都难过登天，想完成爆冷，确实唔知要几高成功率先够。或者退一步谂，最终畀夺冠大热淘汰都系一种荣幸。
德甲班霸好事成双
身为德甲球队喺欧冠淘汰赛嘅独苗，拜仁承载住祖国人民所有期望，而为咗平衡翻五大联赛喺欧冠嘅竞争力、保证足够绰头，大胆讲句，欧足联点会咁易畀佢哋死？既然分组赛体验过巴黎圣日门嘅「金元攻势」，根据「人品守恒定律」(注：意思系人有三衰六旺，唔会一直黑仔)，十六强系咁咦分翻个比锡达斯畀佢哋囖，两回合8比1嘅比数已经讲明一切。仲未够？好事成双八强送多个西维尔你哋叹下。值得一提嘅系，自从2011年之后，此前6届欧冠杯拜仁净系旧年缺席咗四强，今年系时候传承翻「优良传统」喇。最重要系，功勋教头轩历基斯重执教鞭以嚟，球队同安察洛堤麾下相比简直系判若两队，前者亦喺最近刷新咗自己所创嘅欧冠主帅最长连胜纪录(十一连胜)。总体嚟讲，拜仁晋级前景一片明朗。
等咗六十年，西维尔今季终于实现咗球会咁多年嚟未跻身过欧洲顶级赛事嘅八强梦。面对住全队身价超过7亿欧元嘅曼联，西维尔被外界一致睇衰；正所谓「上咗场就唔好怯，怯就输足一世喇」，西维尔从伺机待发到最终完成致命连击，呢次华丽嘅逆袭唔单只帮AC弃帅蒙迪拿「洗脱罪名」，仲为所有西维尔球员、拥趸带嚟无尽喜悦，绝对系载入史册嘅一役，同旧年淘汰自己嘅李斯特城真系有几分相似。一句到尾，西维尔嚟到八强算系完成任务喇，今次对手拜仁同曼联完全唔同，无论球队体系、领队战术甚至近年欧冠成绩，德甲班霸都明显好过红魔鬼，黑马本色极有可能就此告一段落。
我好似睇过呢一集
皇马对祖记？我哋冇睇错，唔系旧年欧冠决赛重播，只不过系提早见面。同前两组对决唔同，佢哋再次聚首真系令人浮想联翩，但结果无非二选一，皇马继续压制祖记or祖记成功雪耻皇马。睇翻佢哋赛季至今嘅成绩，祖记依然系意甲班霸，联赛重新翻到熟悉嘅领跑位置，欧冠晋级历程无风无浪，实力同上季相比无太大变动，甚至内在层面多咗一份沉稳。但皇马就今时唔同往日囖，联赛争冠希望渺茫，国内杯赛冇份争标，唯一希望得翻欧冠。如果可以再度蝉联，三连冠呢个纪录预计未来好多年都难有球队打破。喺咁嘅前提下，虽然实力同状态睇起身都唔及旧年，不过所有注意力集中喺一条战线嘅银河战舰似乎更加无懈可击。一切都要等到大家明刀明枪先见分晓。
英超两大流派决战
唔洗讲都知，主流联赛最具观赏性嘅必然系英超，虽然话今届5支参加欧冠嘅球队全部杀晒入十六强，不过嚟到呢个阶段就系得翻两支，令人更加感到唏嘘嘅系，下一圈嘅四强得翻一支，同过去几年西甲频频有三队杀入四强嘅强盛真系冇得比。点都好，曼城同利物浦总算系当今英超最具观赏性嘅球队。先讲蓝月亮，哥迪奥拿喺度将自己嘅艺术发挥到极致，今季重金打造嘅后防线为冲锋陷阵嘅一众攻击手最大化保驾护航，高速率传控渗透令其进攻变得无坚不摧，令今季英超冠军归属变得毫无悬念。而喺主打高压迫抢反击嘅克洛普麾下，利物浦今季始终保持顶级竞争力，如果唔系欠缺足够稳定性，佢哋肯定唔止系争前四咁简单。回顾两队今季联赛双循环交手，大家都喺主场各执一胜，实力可谓不分高低。但毕竟欧冠淘汰赛系180分钟嘅比赛，到底系更加稳定嘅曼城掌控大局，定系令人热血沸腾嘅红军笑到最后？等我哋拭目以待。
分享到：