云格值得所有人嘅尊重。 正所谓字数越短，新闻越大。英超豪门阿仙奴官方喺寻日下午宣布与球队共存亡已经22年嘅主帅云格将于今夏正式离任，一个属于云格嘅阿仙奴时代就此落幕。
对于云格离任，相信过去几年有唔少波友都喺脑海中设想过呢个景象，但当呢一日真系到嚟之际，除咗平静，更多嘅会系感到意外。皆因喺过去呢22年嚟，同曾经嘅费Sir之于曼联一样，云格亦早已成为阿仙奴嘅代名词，大家都估唔到呢位球队象征会喺呢个时候宣布离讯，甚至无人会觉得云格真系会道再见。22年嘅时间，823场英超赛事(截止目前)，三次喺英超笑到最后，七次捧起足总杯，球队既经历过2003-04赛季嘅英超不败夺冠辉煌，又遭遇过多年无冠嘅尴尬。不过陪伴先系最长情嘅告白，云格喺任内不仅成功塑造咗一支崭新嘅阿仙奴，从传统英式冲吊踢法转变到传接至上嘅美丽足球，俘虏咗一代又一代厂迷嘅心。同时阵中将士人来人往，阿当斯、伯金、亨利、皮里斯、龙格堡、韦拉等如雷贯耳嘅名字喺阿仙奴经历成长与离去，唯有云格无论喺高低潮皆默默坚守。「我嘅爱与支持永远都在」，呢句话喺云格简短嘅离队声明中说道，其实无人会怀疑呢位法国教头对阿仙奴嘅爱，只系无人会相信呢份爱亦终于要迎嚟离别嘅味道。
其实云格远有比依家更好嘅离队时机，而无需喺近几年饱受苛责，甚至系惨遭比赛中盘旋喺上空嘅「Wenger Out」标语嘅羞辱。正如纽卡素主帅宾尼迪斯所言，云格或者会系球坛中最后一位如此长时间执教嘅领队。皆因如今足球世界当中充斥住太多嘅金钱泡沫，急功近利已成为常态，耐心反而成为了稀缺品，一两场赛事嘅结果就会将矛头直指主帅，可持续嘅球队健康发展道路已不受待见。冠军自然人人想要，但睇返云格过去呢22年嘅时光，佢不仅始终为球队保留住一个稳健嘅财政状况，纵使近年过得并唔如意，但仍然留下咗一套仍具竞争力嘅班底予继任者。可能云格唔甘心就此被时代巨浪所击败，伟大嘅人都总想要胜天半子，就算结尾惨淡收场，但至少曾经面对面一较高下。
正所谓「知我罪我，其惟春秋」，云格呢22年嘅阿仙奴生涯相信日后总会有一个公允嘅评价。而天下无不散之筵席，无论呢位法国教头之后系选择就此归隐定系如传闻般将巴黎圣日门作为人生新旅途，我哋亦只有祝福。可能对于云格乃至阿仙奴而言，素有教授之称嘅前者喺22年之后终于舍得叫「同学落堂」，双方亦都终于又迎嚟咗一次人生拐点，但未来条路会系点就暂时无人知，相信2018年夏天就势必会系一代波友同青春作道别嘅日子。
分享到：