FC东京众将显然对和局并不满意。 喺啱啱结束嘅一轮日职联赛事当中，排名二、三位嘅FC东京和札幌冈萨多直接碰面无疑系最为令人关注嘅对决。可惜热闹有余，入波却欠奉，一场0比0嘅和局令到本轮赢波嘅一哥广岛三箭领先优势已经扩大到10分。
今仗坐镇主场嘅FC东京喺上半场就踢得极为进取，并且建立咗明确嘅场上优势，不过喺札幌冈萨多相当顽强嘅抵抗之下，前者始终无功而返。而双方喺下半场赛事中亦一直未能寻觅到杀机，最终全场比数定格为0比0。
由于一哥广岛三箭本轮挥军仙台维加泰继续连胜之路，本轮失咗2分嘅FC东京已经落后前者达双位数分差。想要避免广岛三箭一枝独秀，FC东京嚟紧需要好好谂下对策，与此同时，早前刚刚夺得日职联4月份MVP嘅外籍射手D.奥利华拉喺进入5月份之后状态明显下滑，尽快搵返入波感觉亦系当务之急。
另外，颇为受到波友关注嘅浦和红钻本轮联赛继续不胜，过去6轮联赛仅得1胜嘅佢哋目前14轮过后排名第13，实在令人始料不及。