祖夏特此前已表明不满落选。
辛度华拿用退出国家队来表达不满。 四年一度嘅世界杯距离大家已经越嚟越近，无论系球迷定系落场嘅球员均势必会好好享受呢道足球盛宴。但每队幸运儿就得23位，而随住各参赛队伍陆续公布最终大军名单，有人欢喜有人愁嘅味道就更显浓郁。
论实力，英格兰肯定算唔上系今届赛事争标最大热门，但论人气，三狮军团就绝对有资本笑傲群雄，因此佢哋嘅23人最终名单亦令人特别关注。而睇返英格兰喺本届赛事嘅最终入选名单，可惜嘅地方肯定有，例如利物浦双星奥斯利张伯伦和拉兰拿就分别因伤被耽误、曾被誉为英格兰左路答案嘅路基梳尔亦不见踪影；而为国征战过多届赛事嘅门将祖夏特最终因为状态问题遭放弃、生涯发展同样未如人意嘅中场韦舒亚与俄罗斯遗憾擦肩而过等，则更多系一个务实嘅选择。皆因睇返成份名单，主帅修夫基更多系参照返球员过去一季嘅表现去作挑选，诸如小将路夫斯卓克和改踢左闸焕发青春嘅艾殊利杨格喺啱啱结束嘅本季赛事中都有令人眼前一亮嘅发挥，征战世界杯亦毫无疑问系对佢哋努力嘅一个奖励。
球星数量一向多到冇朋友嘅巴西及法国亦喺近日公布咗征战本届世界杯嘅最终23人大名单，如果话边闸丹尼艾华斯此前因伤告别世界杯令人遗憾嘅话，如中后场万金油T.费宾奴、新星艾科亚和快闸阿历斯辛特路等好手嘅落选则更加显得森巴军团嘅「暴殄天物」。至于法国方面，系人都知佢哋如今处于人才井喷期，但两大攻击手马迪尔和拿卡锡迪仅能够入选后备名单则确实令人始料不及。皆因无论从各方面去睇，甚至放去任何一支国家队中，此两将都有足够本领去创造好成绩。而且法国嘅后备名单中尚有京士利高文和拉比奥特等悍将，实在令人羡慕球队班底厚度之余，亦替多位球星嘅落选感到惋惜。
至于有皇马一哥C.朗拿度领军嘅葡萄牙，去年夏天过档巴塞嘅后卫尼尔逊森美度无缘踏上世界杯舞台令外界哇声一片；而今季喺英冠赛场踢到风生水起嘅攻击手鲁宾利维斯，最终未能搭上世界杯尾班车亦令人无尽唏嘘。同样嘅情况喺德国国家队亦有上演，喺此前公布嘅一份27人初选大名单当中，过去一季发挥抢眼嘅拜仁射手辛度华拿最终功亏一篑；曾经嘅本土希望葛斯亦因为越踢越沉，从当年嘅必然正选到如今连初选大名单都无法进入。虽然话就话仲有可能因为球队出现伤病情况喺规定时间前换人，但相信绝大部分嘅落选球员已经心死，正如辛度华拿喺接受采访时所讲：「我要立刻退出国家队，我希望坦诚啲、直接啲，睇嚟我不在国家队主帅嘅计划中，现在我职业生涯里最重要嘅事已经很清晰，就是为我爱嘅拜仁效力。如果话我对未能获得国家队征召唔失望，咁我就系讲大话。希望我嘅队友们能在俄罗斯取得好成绩，带住冠军返嚟。」