C.朗拿度食糊能力无需怀疑。
迪亚高哥斯达竞争力不容小觑。
卢卡古攻坚能力一流。
夏利卡尼系英军嘅争胜最大资本。 2018年世界杯正进行的如火如荼，但喺炎炎夏日之下，无论系喧闹嘅俄罗斯定系本澳一众波友中，都定必会有一番冷风喺心中吹过。皆因赛前被视为夺冠大热嘅多支劲旅如阿根廷、德国和巴西等均喺首轮分组赛中各有各坎坷，一旦次轮分组赛再有差池，一众劲旅随时提前讲拜拜。而喺另一个战场，一众攻击手们亦为神射手荣誉展开争夺。
要数本届赛事目前为止最为耀眼嘅球星，当然非葡萄牙一哥C.朗拿度莫属，首轮分组赛与西班牙嘅强强对话，前者几乎可以话系凭藉一己之力带领葡军逃过失利嘅尴尬。同时3个入球亦令到呢位葡萄牙领袖暂时领跑神射手榜，考虑到葡萄牙剩余两轮分组赛对手分别系实力较弱嘅摩洛哥和伊朗，C.朗拿度入球账户有望继续「增值」，喺淘汰赛到嚟之前，前者喺神射手榜上拉大领先优势相信问题不大。
当然C.朗拿度目前身后追兵甚多，其中迪亚高哥斯达(西班牙)、卢卡古(比利时)和夏利卡尼(英格兰)均喺首轮分组赛同告梅开二度。而且得益于同组对手唔同，迪亚高哥斯达喺分组赛剩余两轮中均势必会成为摩洛哥和伊朗后防线嘅心头大患，加上西班牙偏向主导进攻嘅战术体系，佢喺神射手榜上嘅后劲绝对不容忽视。至于卢卡古和夏利卡尼则由于需喺分组赛末轮直接碰面，考虑到两队实力相近，场面势必势均力敌，二人想要取得突破就可能需要喺次轮分组赛中(比利时VS突尼西亚、英格兰VS巴拿马)寻求突破。
但既然讲得今年世界杯首轮冷风劲吹，咁就当然事出有因，就如阿根廷一哥美斯咁，球队分组赛首轮喺冰岛身上占唔到任何便宜，前者更加遗失射门鞋，甚至连十二码都宴客收场。虽然名宿马勒当拿就出嚟发话唔应该指责美斯，但若果呢位阿根廷灵魂无法喺接下来与克罗地亚呢场硬战中重拾状态，阿根廷绝对会危危乎。与此同时，备受外界瞩目嘅巴西同样喺分组赛首战未能敲响胜鼓，其中当家球星尼马喺比赛中遭遇瑞士球员各种粗暴防守对待，导致个人陷入无尽嘅缠斗当中。而面对尼马选择杀伤战术已经成为唔少队伍心照不宣嘅防守策略，能否尽快谂到对策可谓至关重要。